அரபு மல்லி ஆட ...அபிநயங்கள் கூட..

வீட்டின் எதிரில் உள்ள ரோசா செடியில் பூக்கள் பூத்து பூத்து  குலுங்கினாலும்   ஏதோ பூச்சி தாக்கியதால் இலைகள் சற்று பாதிக்க பட்டு இருந்ததால் அதற்கு  மருந்து வாங்க கடைக்கு சென்றேன்.

இந்த வித விதமான ரோஜாக்கள் வெவ்வேறு  நிறத்தில் போது குலுங்குவதை  பார்க்கையில் தான் மனதில் நம்மை அறியாமலே ஒரு மகிழ்ச்சி. 

வாரத்திற்கு இருமுறை இந்த பூக்களில் சிலவற்றை பறித்து  அலங்கரித்து இல்லத்தின் நடுவில் வைத்து அழகு பார்ப்பதே அழகு தான்.

கையிலே பாதிக்கப்பட்ட சில இலைகளை  எடுத்துக்கொண்டு அதை அவர்களிடம் காட்ட, அவர்களும் ஒரு மருந்தை தர அதை வாங்கி கொண்டு  வெளியேற முற்படுகையில், அது கண்ணில் பட்டது.

மல்லி..

என்னதான் ரோஜா பூக்களின்  ராஜாவாய் இருந்தாலும் மல்லி பூக்களின் ராணியாயிற்றே. அருகில் சென்று என்ன வகை மல்லி என்று சோதிக்கையில்  ...

அந்த காலத்தில் இல்லத்தில் இருந்த மல்லி. அதே பூ, அதே வாசம். அதையே கூர்ந்து பார்த்து கொண்டு இருக்கையில் அங்கே பணிபுரியும் அம்மணி..

"அது என்னனு தெரியும் தானே..!!?"

"எஸ், ஜாஸ்மீன்..."

"நாட் எனி ஜாஸ்மீன், அரபியன் ஜாஸ்மீன்.."

மனதில், இது என்ன கதையா இருக்கே.. அரேபியா வெயிலுக்கு இது எப்படி அங்கே வளரும். இது கல்  தோன்றி மண் தோன்றா காலத்திற்கு முன் தோன்றிய தமிழகத்தின் மல்லி அன்றோ என்று வாங்கி வந்தேன்.

வீட்டின் எதிரில் டசன் கணக்கில் ரோஜா, மற்றும் கொடி  மல்லி வகைகள். 

அவை அனைத்தும் இருந்தாலும் இவள் "ராணி" அல்லவா! அதற்கென்று ஒரு சிறப்பு இடம் வேண்டும் என்று வாசலிலே வைத்தேன், தினந்தோறும் வாசம் காண!