அமெரிக்க தேர்தலில் பிடித்தது...

வல்லரசான அமெரிக்க நாட்டில் வாழ்வதை ஒரு வரமாக கருதுபவன் நான். நன்மை தீமை எங்கும் உண்டு... அதை எடை போட்டு பார்த்து நன்மை தான் அதிகம் என்று எனக்கே ஒரு தீர்ப்பு வழங்கி கொண்டு தான் இந்த வாழ்க்கையை இங்கே ஆரம்பித்தேன்.

இந்த நன்மைகளில் ஒன்று தான் இந்த நாட்டின் தேர்தல் முறை. அதில் எனக்கு பிடித்த சில விஷயங்களை இங்கே பகிர்கின்றேன்.

• அதிபருக்கான வாக்குகளை மக்களே நேரடியாக செலுத்துவது.

• இரண்டே கட்சி... மூன்றாவது என்று ஒன்று இருந்தாலும். பிரதான கட்சி இரண்டே...

• பிரச்சாரம்... இந்த தேர்தல் நடக்கையில் அடியேனின் உறவினர்கள் இந்தியாவில் இருந்து வந்து இருந்தார்கள். சாலை ஓரத்தில் இருந்த சிறிய விளம்பர பலகைகளை பார்க்கையில் .. இது என்ன என்று கேட்டார்கள். இது தேர்தல் பிரச்சார அட்டைகள் என்றேன்.. அவர்களால் நம்ப முடியவில்லை. தேர்தல் முடிந்த அடுத்த நாளே இந்த அட்டையை வைத்தவர்களே அதை அங்கு இருப்பதை அப்புற படுத்துவதை பார்க்க முடிந்தது.

• வாக்குகளுக்காக பணம் - மிக்சி - விசிறி -லொட்டு - லொசுக்கு என்று ஒன்றும் யாருக்கும் தரவில்லை.

• அதிபராக போட்டியிடுபவர்களுக்கிடையே நேரடி விவாதம். இது மூன்று முறை நடக்கும். அதை நேரடி ஒளிபரப்பு செய்வார்கள் .அதை பார்க்கையில் இவர்களின் செயல் திட்டம் வாக்காளர்களுக்கு விளங்கும்.

• துணை அதிபர் பதவியும் முக்கியம் தானே. ஒரு வேலை அதிபர் தாம் பதவியில் இருக்கும் போது இறந்து விட்டால் துணை அதிபர் உடனடியாக அதிபராக பதவி ஏற்பார். துணை அதிபர்களுக்கும் இந்த நேரடி விவாதம் ஒரு முறை நடக்கும். 

• வாக்களிப்பது மிக எளிது. தபாலில் அனுப்பலாம். நேராகவும் செல்லலாம். 

• வாக்கு அளித்து முடிந்த 5- 8 மணி நேரத்திற்குள் முடிவு. நான்கு ஐந்து நாட்கள் காத்து கொண்டு  இருக்க தேவை இல்லை.

• கடைசியாக எனக்கு மிகவும் பிடித்த விஷயம்! ஒரு நபர் அதிக பட்சம் இரண்டு முறை  (8 வருடம்) அதிபராக பதவி ஏற்கலாம். அம்புட்டு தான். தள்ளாடும் வயதிலேயும் .. உடல் நலம் இல்லாத போதும் கூட.. பதவி வெறி பிடித்து அலைய ஆசை பட்டாலும், சட்டம் அதற்கு இடம் தராது.

பின் குறிப்பு ;

இதை படித்தபின்.. உடனே... இங்கே தேர்தலில்  இது மோசம் அது மோசம் அதை பற்றி ஏன் எழுதவில்லை என்று பின்னூட்டமிட்ட போவர்களுக்கு ஒரு அறிவுரை. நான் எழுதுவது எனக்கு பிடித்தது. உங்களுக்கு பிடித்ததை நீங்கள் எழுதவும்.